6年前，可立中學，禮堂‥‥‥
「校長、各位老師、各位同學：
大家好，我係7A班劉幹文。正如剛才陳Sir所講，今日我們5個人企出來的目的係同大家分享一下讀書的心得。關於讀書，我諗大家最關心的問題一定係「到底考試點樣可以考得好﹖」
當我仲係小學的時候，我媽媽成日同我講：「你睇下隔離屋光仔幾叻吓，年年都考第一；睇下你，蠢到死，咁淺的數都唔識計。」年紀漸大，我發現原來媽媽的教訓並唔係事實的全部。係，我承認我唔及隔離屋亞光仔咁醒目，但係我開始質疑個人叻同考試考得好是否可劃上等號。
講一個故事畀大家聽‥‥‥
從前有個小朋友在小食部前面大喊，
小食部的肥叔叔問佢：「文頭，做咪係度喊呀?」
小朋友回答道：「我‥‥‥我想買薯片，唔夠錢，薯片要成1紋，平時媽媽俾1紋零用錢我，今日俾得兩個5亳子‥‥‥」
肥叔叔笑說：「正傻仔，攞兩個5亳子來，呢包薯片你攞去。」
小朋友滿足地帶住薯片離去，佢對肥叔叔肯收平佢包薯片相當高興。
回家以後佢仲同媽媽講番件事。豈不知媽媽唔單止唔領情，還破口大罵：
「兩個5亳子加埋咪1紋囖，佢邊有收平你呀，蠢到死。你睇下隔離屋光仔幾叻，年年都考第一；睇下你，蠢到死，咁淺的數都唔識計。」
呢個小朋友真係蠢到冇人有呀呢。不過，好在呢個小朋友勝在夠勤力，人地用1個鐘頭去讀書，佢就用夠2個鐘頭，大不了咪睇少一兩集「龍珠」。幾年過後，呢個小朋友讀書考試真係有左唔少進步。而今日，佢仲竟然有機會來到呢個台上同大家分享佢讀書的心得同埋分享佢呢段咁愚蠢的經歷，你話係幾咁神奇呢。所以話，考試考得好其實並唔係天才的專利，世界上其實有幾多個愛因斯坦﹖我相信每一個人都有機會考試考得好好，問題只不過係我們去唔去做。世界上根本就冇天生的天才，所謂的天才只係一些為達到目標而努力不懈的人。
仲有，呢個小朋友做事從來都唔會輕易放棄。我記得佢好鍾意打籃球，但佢每次射籃射失的時間，佢隔離亞潘教頭總會話：「太差了，咁都射唔入。」而每次佢射入的時間，都不免會回應亞潘教頭一句「太強了，咁都射得入。」其實射失一球半球並沒有什麼大不了，Michael Jordan 都唔係球球入啦，做人的道理咪一樣，一兩次失敗並唔代表你成世失敗，今次考試考得唔好大不了咪下次再來。跌低左咪起番身囖，唔通成世瞓係地下度賴死mei，Michael Jordan 都唔係天生就識打籃球啦。
最後，僅以學生會副主席的身份衷心感謝所有老師、同學對我們學生會過去一年的支持；而個人方面，我特別祝願今日生日的朋友「生日快樂」。多謝各位。」
6年過後‥‥‥
場地雖由座無虛席的可立禮堂換為我這個小小的Blog，但我真正想講的話依舊只有一句：
「祝你生日快樂。」
